Luigi Natoli: Surdati valurusi cci nni su pi tuttu u munnu; ma comu u surdatu italianu nun cci nn’è! - Tratto da: L'umbra chi luci (Raccolta Suruzza!)

E chi? l’omu dunca havi a canciari d’opinioni pirchì cci succedi una disgrazia? E chi semu banneri di cannavazzu?... Iu cci appizzavi l’occhi; ma cc’è cui cci appizza a vita; ma cu tuttu chistu, l’opinioni nun si cancianu!... Vossia quannu fici ‘u panagiricu di San Sibastianu... ci pensa? Dissi ca si fici ammazzari, ma nun arriniò la fidi... Chidda d’a patria è puru fidi... e nun s’avi a rinnegari. A patria cci la detti Diu, e cu pati pi la patria, obbedisci a Diu!... Vossia cci l’avissi a pridicari a ddi poviri fimmini chi vennu nt’â a chiesa, inveci di maravigghiarisi di mia...

Iu sugnu sempri cuntrariu a li guerri; ma la nostra è n’autra cosa: anzi ti dicu ca nui cummattemu pi nun fari succediri cchiù sti stragi spaventevuli!... Guerra a la guerra!... Ma pi nun fari succediri cchiù guerri, Atanasiu, cci avemu a rumpiri pi sempri li denti a tidischi ed austriaci, priputenti e barbari, e a ogni populu cci avemu a dari libirtà e giustizia... E nfina chi nun s’otteni libertà e giustizia, avemu a cumbattiri, ed è doviri nostru...

Una cosa aviti a cridiri, ca surdati valurusi cci nni su pi tuttu u munnu; ma comu u surdatu italianu nun cci nn’è! Diu u fici e poi rumpiu a stampa... Dunque aviti a sapiri c’avevamu a pigghiari Munti Sei busi; una muntagna chi l’Austriaci avianu fortificatu in una manera terribili. Ordini a lu mê reggimentu di avanzari alli 10 precisi, e scacciari a l’austriaci di una forti posizioni, chiamata u Trinceruni... A mê cumpagnia aveva assartari la prima. U nostru capitanu... chi omu! Nn’haju conosciutu picca!... U nostru capitanu dici “Ragazzi, alle 10 e menza il Trincerone deve essere nostro. So chi siete!” 

Tutta la notti, l’arba, li primi uri, c’era statu un gran cannuniggiamentu: un infernu! Lu celu pareva chiuvissi focu: lu fracassu dava ‘ntesta, ca ci pareva d’impazziri... Nui dintra i ripari, aspittavamu l’ordini... Chisti su i momenti cchiù tirribili; l’aspettazioni, ‘u pinseri d’a famigghia, lu periculu mettinu una smania, un’irritazioni... I nervi diventanu cordi e nun pari l’ura di jiri all’assartu... Basta. A li deci precisi, roggiu a la manu, u Capitanu dici: “Avanti, ragazzi!” Saltamu fuora d’i ripari, e avanti... Ma chi vidistivu? U Trinceruni addivintau un Muncibeddu: scupittati, mitragghiatrici, cannuna, bumbardi, nn’investinu di focu. I nostri cadevanu comu li muschi... Cci nn’eranu ca mancu dicianu cìu! Un fizziunu e ‘nterra. Poviri figghi!

Ma a cumpagnia nun s’arresta. Strisciannu, satannu di vausu a vausu, sparannu, nn’avanzavamu sutta dda tempesta di focu. ‘U capitanu... quant’era beddu! S’avanzava a lu scupertu, dicennu sempri: “Coraggio! Avanti!”... Iu cci caminava vicinu; a un trattu, lu viju traballari e cadiri: curru: era feritu ‘mpettu e nt’ô na coscia. U vogghiu purtari indietru, e nun voli. “Appoiami cca, e torna ô tô postu”... Nt’â stu mentri l’Austriaci fannu una sortita, pi rispiucirinni, prima chi si muvissiru l’autri nostri cumpagni, e disordinarinni... La mê cumpagnia era ridutta la metà; iddi eranu cchiù assai, armati di bummi a manu, mazzi firrati, pugnali, cutiddazzi sganghiati... Chi vidistivu! Un corpu a corpu furiusu, un spaventu; ma l’Austriaci appiru a scappari dintra lu Trinceruni, dunni lu focu vineva cumu una lava... Eramu vicini a li reticolati rutti e sconvolti, ma quant’eramu? L’officiali tutti caduti, u sergenti cadutu... nui eramu vinti!... Allora dicu a li mê cumpagni: “Picciotti, ma chi pi veru nun avemu a pigghiari lu Trinceruni? Avanti! e viva l’Italia!... Vinti eramu, e parevamu vinti mila! Comu tanti furii, trapassamu li reticulati, tiramu bummi a manu nt’â la trincea, gridannu: “ Arrenditi! Arrenditi!” A mia mi veni ‘ntesta di gridari, comu si cumannassi: “1^ compagnia a destra!... 4^ compagnia di corsa: Savoia!” L’Austriaci si cridittiru da veru ca cc’eranu sti cumpagnii, e jittaru i fucili, e jisavanu li manu, dicennu: “Bono taliano! bono taliano!...” Eranu centu sissanta, e s’arrinneru a quattru surdati. Tanti eramu!... Iu fici nesciri i prigiuneri, mannannuli nt’â li nostri linii, accumpagnati di li mê tri cumpagni, e accuminciavi a gridari: “Il Trincerone è preso! Il Trincerone è preso!...” Quannu vitti ca vinevanu di cursa li rinforzi, iu pinsavi c’avia lassatu u capitanu feritu, e turnavi indietro pi circallu... 

Comu mi vidi, mi dumanna: “Il Trincerone?” – “Prisu, signor capitanu!” – “Bene! E la compagnia?” – “Semu quattru”. Allura aggiarnau e suspirau. Iu m’u carricavi ncoddu, e m’incaminai: ma di cani d’Austriaci, pi nun fari avanzari l’autri cumpagnii, facevanu chioviri una vera grannini di granati supra lu tirrenu. Scuppiavanu davanti, darreri, a li cianchi: cc’era lu periculu di moriri tutti dui, iu e u capitanu. Cci fu un momentu chi mi vitti persu! Nun puteva jiri né davanti né indietru, u capitanu mi dici: “Bravo Montoro, non pensare a me, che sono finito; lasciami qui, e salvati!” Lassallu? Mai, signor capitanu: vita, pi vita!... Viju a pochi passi, nt’â la roccia, un gruttuneddu; a la megghiu cci portu lu capitanu, ma appena lu posu ‘nterra chi ti viju? Tri austriaci, tri pezzi d’omini chi nun finevanu mai, chi forsi, doppu lu corpu a corpu, nun avianu pututu turnari nt’â lu Trinceruni, e s’avevanu ammucciatu dda dintra. Comu mi vidinu si jiettanu supra di mia (gestu di Agata – interessi di tutti) iu saltu indietru, cu un corpu di bajunetta atterru lu primu; la bajunetta si torci; allura votu lu fucili comu una mazza e sferru!... Lu secunnu cadi cu la testa fracassata; lu terzu nun aspetta; jietta l’armi e alza li manu... Iu lu disarmu e lu spinciu ‘nfunnu, mentri u capitanu chianceva d’ammirazioni, e diceva: “Bravu! Bravu!”

Doppu un momentu, quannu mi parsi chi la tempesta era cchiù abbacata, chiamu lu prigiuneri; “Ajutami!...” Alzamu ‘nzemmula u capitanu, e a picculi tratti, scanzannunni, nn’abbiàmu, nfina chi viju dui portaferiti c’a barella. Li chiamu, vennu, cci cusignau u capitanu; ma nt’â stu mentri scoppia dda vicinu una granata: lu poviru Austriacu mancu dissi: “mamma mia!” iu mi ‘ntisi un pugnu nt’â l’occhi, e nun vitti cchiù nenti!... (murmuriu di commozioni, Agata e a gnura Marianna si asciucanu l’occhi. Pausa) Quannu ripigghiavi li sensi era nt’â lu spitali di campu, cu la facci ‘nfasciata, ‘o scuru. ‘Ntisi genti vicinu a lu mê lettu, e una vuci diceva: “Eccu l’eroi, signor generale!” Iu nun sapia di cui parravanu: ma sentu una manu strinciri la mia, una vucca pusarisi supra la mê frunti, e diri: “Baciando te, figliolo, bacio la terra dove sei nato!” Era ‘u generali: a sô vuci chianceva... ed iu chianceva puru! (è commossu, tutti su commossi e bisbigghianu, Agata sugghiuzzìa) Poi, mi dettiru sta midagghia!...

Luigi Natoli: Suruzza! Raccolta delle opere teatrali inedite in dialetto siciliano, ricostruite dai manoscritti dell'autore, con traduzione in italiano a fronte a cura del prof. Francesco Zaffuto. Il volume comprende: 

"Suruzza!" – dramma in quattro atti;
"L’abate Lanza" - commedia in tre atti;
"L’umbra chi luci" - dramma in tre atti;
"Quattro cani supra un ossu" - commedia in tre atti.

Copertina di Niccolò Pizzorno

Pagine 729 - Prezzo di copertina € 25,00

Disponibile dal catalogo prodotti della casa editrice al sito www.ibuonicuginieditori.it

Disponibile su tutti gli store di vendita online e nelle migliori librerie.